屬於香港嘅手信

23 December 2016

am730 屬於香港嘅手信

 

am730 每次去旅行想慳慳哋寄居朋友屋企,為免兩梳蕉咁上去,點都會買啲手信嘅。提起香港有咩出名,魚蛋燒賣碗仔翅又帶唔到上機(曾經試過帶X海叮叮碗仔翅去日本送俾朋友,嗯,佢唔太欣賞囉),咁就唯有由餅食呢啲易hand carry、又擺得嘅手信入手。

友人C話次次都會買長腿天后陳敏之嘅祝奇餅(Blesscuit Bakery)做手信,派俾外國朋友「仔」。咁啱公司附近有一間,就即刻買盒試下!買咗盒細嘅,雖然得6款口味,但都要成$220(28塊),比起其他手信店貴成截。但試真啲,又真係貴得有道理!由於曲奇冇用化學黏合劑,所以非常鬆化,咁當然,一定會食到周圍都係……香酥嘅牛油味慢慢滲出,曲奇口味亦多而創新。個人至鍾意黑松露、飄雪紅桑子同熱情果芒果味,聽講新年限定嘅藍龍蝦曲奇都好正,仲可以灑個法國藍龍蝦粉上去,好似好多嘢玩咁喎!

 

Reference: am730 屬於香港嘅手信

news